الخوف شعور انسانى مشروع شعور غريزى جواناولا بد منه و فى أوقات كتير بيحمينا لكن كمان أكيد لو ملكك مملكتوش و زاد عن حده بيتقلب لضده و بكل نعومة بيتسلل لينا يمشى فى دمنا وبخوف على خوف يغذينا و بنفس نعومته يسيطر علينا بعد ما بيكون بقى جزء مننا يختار الوقت اللى بنآمن فيه ليه و يؤذينا…
صحيح المثل بيقول من خاف سلم لكن كمان الواقع بيقول ان “من خاف ” وارد جدا “ميسلمش” ولا حاجة بالعكس ممكن جدا خوفه يكتفه , يعجزه, يضعفه , يهزمه و ييأسه …
من خاف لو خاف لمجرد انه اتعود يخاف أو من منطلق ضمان الآمان فبيرفع بخوفه يافطة “الحذر” أحب أقوله ان الحذر عمره ما منع قدر …
من خاف لو خاف عشان فاكر انه بيحافظ على الموجود فجايز هو يكون صح بس أكيد كمان هو بيخسر كتير من اللى جاى أكيد هو ماشى فى طريق الركود بيجرى و بيسبق غيره لقاع السكون بيشبك خيوطه بخيوط الخوف اللى هتفضل تتنسج حواليه اكتر و تكون شبكة خيوط وراء التانية لغاية ماتخنقه تضيع ملامحه شوية شوية لغاية ما تخفيه تماما عن الوجود …