كتير بتمر مواقف في حياتنا مع أقرب الناس لينا بتخلينا واقفين فى مفترق طرق مش عارفين ايه التصرف الأمثل اللى مفروض نتصرفه، مش فاهمين رد الفعل الأمثل اللى مفروض نرده عليهم، بنازع نفسنا ما بين قهرة بتصيبنا و بتزقنا كده زق على اخد حقنا وما بين نزعة حنين بتحامى ليهم و توصى قلوبنا عليهم …
بنازع نفسنا ما بين نزعة انتصار للنفس وما بين نزعة مسامحة و ود، بنازع نفسنا ما بين صوت بيلح انك تواجه اللى وجعك وتوجعه كمان زى ما وجعك و ما بين نزعة رفق و لين بحاله …
بنازع نفسنا ما بين اننا نشيل جوانا ونعبى قلوبنا بالجفاء والقسوة وما بين نزعة النسيان …
بنازع نفسنا ما بين كيان انسان بتدور جواه كل الصراعات وبتنازع جواه كل المشاعر وما بين كيان انسان بينسى نفسه وبيدوبها فى كيان غيره روحه ممزوجة بروح غيره …!!!
بنازع نفسنا ما بين أسئلة كتير من غير اجابة، وجايز الاجابة تجيب معاها الاختيار و الاختيار يجيب قرار بس للاسف توهان الاجابة متوه القرار مغلوش على الاختيار معتم الطريق و خافى المصير …
و لكن يفيد بإيه السؤال وليه بندور على الإجابة لما المصير أصلا محتوم ؟!