“مش بتوقف على حد ” … جملة بنصبر بيها  نفسنا ونصبر بيها اللى حوالينا وقت الجرح وقت الوجع، جايز تكون حقيقية لكن كمان بتختزل حقيقة تانية أهم بتختزل  احساس القهر اللى بنعيشه، صحيح إن الدنيا مش بتوقف على حاجة ولا على حد لكن الحقيقة كمان بتقول ان فى حاجات تانية كتير أهم بتوقف جوانا  …

الدنيا مبتوقفش لكن احساسك بالدنيا واستمتاعك بيها وبمعناها ممكن يوقف.

الدنيا مبتوقفش لكن احساسك بالآمان، بالثقة فى اللى حواليك ممكن يوقف.

الدنيا مبتوقفش لكن احساسك بالقدرة على التسامح والنسيان ممكن يوقف.

الدنيا مبتوقفش لكن احساسك بالحب ممكن يوقف، احساسك بالقدرة على العطاء ممكن يوقف.

الدنيا مبتوقفش لكن احساسك بالقدرة على التحمل ممكن يوقف ، طاقتك اللى دايما كانت بتتجدد ممكن توقف.

الدنيا مبتوقفش لكن احساسك بالقدرة على الحلم من جديد ممكن يوقف، قدرتك على الأمل والتفاؤل ممكن توقف.

الدنيا مبتوقفش لكن احساسك بالقوة ممكن يوقف، احساسك بانك لسه قادر تكمل ممكن يوقف.

الدنيا مبتوقفش لكن احساسك بأنك تكون مجبور الخاطر من غير كسرة نفس أو ذلة روح ممكن توقف.

ويوم ما بنوصل لجملة “الدنيا مبتوقفش” ساعتها بنعرف كمان ان فى مسلسل من “الخذلان” ابتدا ومش هيوقف … لما الدنيا مبتوقفش بنعرف انها بتكون قطر واخد فى وشه ودايس على كل حلو عشان يوقفه ومركب معاه  فوق قضبانه كل مر بيوجع ومساعده انه ميوقفش .

الدنيا فعلا  مبتوقفش لكن الحقيقة ان  “احنا ”  اللى أكيد  بتوقف !!!